Алматыда жас құтқарушылар жарысының финалдық сайысы өтті. Оған 16 жалпы білім беретін мектеп пен лицейдің 1600-ден астам оқушысы қатысты. Командаларда ұлдармен қатар қыздар да бар, деп хабарлайды ARDA-AKPARAT.
Сайыс бірнеше кезең бойынша өтті. Жас құтқарушылар өрт техникасын жауынгерлік орналастыру, зардап шегушіге алғашқы медициналық көмек көрсету және оны тасымалдау, судан аспалы өткел арқылы өту сынды тапсырмаларды орындады.
«Жарыс өткізу тәжірибесі көрсеткендей, жарысқа қатысушылар төтенше жағдайларда (жер сілкінісі, өрт және т.б.) дұрыс әрекет ету, физикалық және психологиялық дайындық бойынша практикалық білім алады. Мұндай іс-шаралар қажет болған жағдайда халықты қорғауға, дұрыс дағдылар қалыптастыруға, азаматтық көзқарас тәрбиелеудегі ең тиімді элементтердің бірі», — деп атап өтті Алматы қалалық Төтенше жағдайлар департаментінен.
Командалық жарыс қорытындысы бойынша, № 157 мектеп бірінші орынды иеленді. Екінші орынды № 47 жалпы білім беретін мектеп оқушылары жеңіп алды, үшінші орын № 59 мектеп командасының қоржынына түсті. Жеңімпаздар мен барлық қатысушыларға алғыс хат пен кубок табыс етілді. Енді қалалық жарыстардың жеңімпаздары осы жылдың маусым-шілде айында Көкшетау қаласында өтетін республикалық жарыста бағын сынайтын болады.
