Ақтауда баспанасыз және жұмыссыз қалған жас әйел сәуір айынан күні бүгінге дейін теңіз жағасында шатырда тұруға мәжбүр болған. Ресейден қайтып келген оны туыстары қабылдамаған. Оның қиын жағдайын білген қала тұрғындары жұмыс пен баспана мәселесін бір күнде шешіп берді, деп хабарлайды ARDA-AKPARAT.
Ақтаулық еріктілердің бірі Анатолийдің жазуынша, Наталья — Қазақстан азаматы. Ол кез келген көмектен бас тартып, оған тек жұмыс табуға көмек сұраған. Оның барлық қажетті құжаттары және екі жоғары білімі бар.
Еріктілер оған азық-түлік сатып алып барды.
«Әйелдер оған келіп сөйлесті. Қалада туыстары бар, бірақ олар араласпайды екен. Дәл қазір оны алып кетіп, жұмысқа орналастырып, баспана береміз», – деп жазды чатта белсенділердің бірі.
Бірнеше қатысушы оны уақытша тіркеуге тұрғызуды ұсынды. Тағы бірі оған жағдайы жақсарғанша пәтерін ұсынатынын жазған.
Бірнеше сағаттан кейін әйелді еріктілердің бірі үйіне алып кеткені белгілі болды. Ол Натальяға жұмыс іздеп жүр.
Анатолийдің айтуынша, Наталья — жергілікті тұрғын. Ол Мәскеуге жұмыс істеуге, оқуға кеткен. Коронавирус пандемиясы басталғанға дейін әртүрлі жерлерде жұмыс істеген.
Жылдың басында ол туған жері Ақтауға оралды. Белсенділер чатында жазылғандай, оның туыстары: «Сен мықтысың, біз саған сенеміз» деп, үйге кіргізбей қойған.
«Қаңтардан сәуірге дейін ол әр жерде жұмыс істеген. Содан кейін паналау үшін шатыр сатып алған. Күніне үш мыңға дәретхана тазалаушы болып жұмыс істеді. Жалақыны көтеруді сұраған ол жұмыстан босатылған», — деді Анатолий.