Сейсенбі күні Брюссельдегі «Cinema Palace» кинотеатрында «Дос-Мұқасан» фильмі көрсетілді, деп хабарлайды ARDA-AKPARAT.
Мәдени шара Қазақстанның Бельгиядағы елшілігінің қолдауымен өтті. Фильм қазақ тілінде ағылшын субтитрімен көрсетілді.
Картинаны тамашалауға Бельгияда тұратын қазақ қауымының өкілдері, сондай-ақ еліміз өнеріне қызығушылық танытқан жергілікті халық келді.
Көрермендердің бірі Ферисел Ливию «Дос-Мұқасан» фильмін көруге қуана келіскенін жеткізді. Ол ансамбль мүшелері Қазақстанға танымал тұлғалар екенін, сонымен қатар оның құрылуының үлкен тарихы барын айтты. Сондықтан Бельгия тұрғыны кинотеатрға аса қызығушылықпен келген.
Қазақстан Республикасының Бельгиядағы Төтенше және өкілетті елшісі Марғұлан Баймұхан «Дос-Мұқасан» фильмінің Еуропа астанасында көрсетілуі – тағы бір тамаша мәдени оқиға екенін атап өтті.
«Бүгін еуропалық және бельгиялық көрермен үшін аты аңызға айналған «Дос-Мұқасан» ансамблі туралы қызықты фильм көрсеттік. Оны біздің елде бірнеше буын өкілдері біледі және шығармаларын сүйіп тыңдайды. Бүгін режиссер Айдын Сахаман түсірген, ұжымның ұзақ та, қызықты жолын баяндайтын осы фильммен бөлісуді жөн көрдік. Фильмнің «жеңіл» болғаны сонша, еуропалық жұртшылық оны жоғары ықыласпен қабылдады. Қазақстандық фильм еуропалық кинодан сәл өзгеше болуы мүмкін, бірақ бельгиялық көрерменнің реакциясы оларға қазақстандық ансамбль туралы түсірілім ұнағанын көрсетті. Осы игі дәстүрді жалғастырамыз деп ойлаймын», – деді Марғұлан Баймұхан.
Айта кетейік, түсірілім жеті айға жуық уақытқа созылды. Фильм 2022 жылы шықты. Сценарийін жазған – Ефрат Шәріпов, продюсері – Айгүл Байбек, музыкалық жетекшісі – Айдын Сахаман.
Актерлік құрам портреттік ұқсастық бойынша таңдалған. Басты рөлдерді актер Мейірғат Амангелдин, Мақсат Сәбитов, Елдос Шайкенов, Саят Мақұлбаев, Айғаным Сағынбаева, Никита Погодаев, Нұрғиса Қуанышбайұлы және Әбілмансұр Серіков сомдады.Танымал блогерлер мен вайнерлер Артур Асқарұлы мен Зухра Сайпи де дебюттік ролін ойнап шықты.
«Дос-Мұқасан» фильмінің жабық көрсетілімі өткен жылдың 27 қыркүйегінде өтті. Ал екі күннен кейін Қазақстанның барлық кинотеатрларына прокатқа шықты.
«Дос-Мұқасан» —1967 жылы құрылған эстрадалы вокалды аспаптар ансамблі. Негізін қалаған – Досым Сүлеев, Мұрат Құсайынов, Қамит Санбаев, Александр Литвинов. Топтың атауы да осы әншілердің есімінен құралған. Әр жылдары ансамбль құрамында Бақытжан Жұмаділов, Мейірбек Молдабеков, Шәріп Омаров, Құрманай Омарова, Нұртас Құсайынов, Ақжол Мейірбеков және тағы басқалары болды.