Екібастұз қаласының оқушылары танымал шетелдік мультфильмдердің кейіпкерлерін қазақша сөйлетіп жатыр, деп хабарлайды ARDA-AKPARAT.
Оқушылардың жобасы республикалық деңгейде қолдау тауып, Қазақстандағы алғашқы балалар дубляж студиясын ашуға мұрындық болды. «Қайнар» студиясы білім беру және бос уақытты қамту кешенінің жанынан ашылды.
Бұл идея орталықтың педагог-ұйымдастырушысы Еркін Құсанға тиесілі. Өткен жылы балаларды медиа саласында қазақ тілінде дамытуға бағытталған «Ұлттық калорит» үйірмесі ашылған болатын.
Балалар арасында мемлекеттік тілдің аясын кеңейтіп, насихаттау мақсатында мультфильмдерді қазақша дыбыстауды көздедік. Каникул кезінде «Беймакс» туындысын қазақша дыбыстап көрдік. Жеті минуттық мультфильмді дыбыстау кезінде техникалық қиындықтарға тап болдық. Алайда, бастаған істі тоқтатқымыз келмеді. Алғашқы шығармамызды YouTube-арнамызға жүктедік. Бұлай болатынын күтпеп едік. Мыңдаған қаралым жинап, кейін бұл жобамызбен «Тәуелсіздік ұрпақтары» байқауына қатыстық. Шараны Ақпарат және қоғамдық даму министрлігі ұйымдастырды, — дейді Еркін Құсан.
Осылайша, «Өзгеше бол» дубляж студиясы 1000-нан астам жоба жиналған байқау жеңімпаздарының қатарынан көрінді. Жуырда студияның жастары заманауи жазу құралдарын сатып алды. Кәсіби құрал-жабдықтан бөлек студияда дыбыс жазу кабинасы, аударма жұмысына арналған арнайы орын мен түсірілімге арналған алаң бар.
Ендігі мақсатымыз – «Удача» атты үздік шетелдік мульфильмді дыбыстап, 800 көрерменге арналған жергілікті кинотеатрда паш ету. Кейін отбасылық қаралымға кеңес берілген мультипликациялық блокбастерлерді де дыбыстағымыз келеді, — дейді студия жетекшісі.
Қазіргі уақытта студияға 50-ге жуық шәкірт барып жүр. Араларында қазақ тілін меңгергісі келетін өзге ұлт өкілдері де бар.