Түркістанда Ахмет Байтұрсынұлының 150 жылдығына орайластырылған «Алтын домбыра» республикалық ақындар айтысы өз мәресіне жетті. Айтыс сүйер қауым асыға күткен жыр аламаны «AMANAT» партиясының қолдауымен өтті, деп хабарлайды Arda-ақпарат.
Қазылар алқасының төрағасы, көрнекті өнер қайраткері Асанәлі Әшімов түркі әлемінің рухани астанасын дүбірге бөлеген айтулы доданың мәні мен маңызына тоқталып, жылы лебізін білдірді.
«Түркістан – ер түріктің бесігі» деп Мағжан Жұмабаев жырлаған ұлы, тарихи қалада «Алтын домбыраны» өткізейік деген шешім қабылданды. Онысы дұрыс. Атағы мен абыройы бар ақындардың жақсылары келіп, халыққа осында өнер көрсетті. Түркістан халқының әл-ауқаты түзеліп, мәдениеті көтерілсін деп тілеймін! Ел аман болсын!» – деді Асанәлі Әшімов.
Екі күнге созылған жыр бәйгесінде ақындар ұлт қайраткерінің өрнекті өмір жолы мен еселі еңбегін, жанкешті қызметін жырға қосты. Көзіқарақты көрерменнің көңілін көтеріп, сөз барымтасы жарасымды әзіл, келісті қалжыңмен өрілді. Ал тартысты доданың ақтық кезеңінде Біржан Байтуов пен Рүстем Қайыртайұлы және Еркебұлан Қайназаров пен Шұғайып Сезімхан өнер көрсетті.
Сөйтіп, бір кездері осы Түркістан өңірінен түлеп ұшқан Еркебұлан Қайназаров қазылар алқасының шешімімен «Алтын домбыра-2022» иегері атанды. Жеңімпазға «Алтын домбыра» және 3 млн теңге көлемінде сыйақы табысталды.
Ал жүлделі І орынды алматылық Рүстем Қайыртайұлы иеленді. ІІ орынға Біржан Байтуов пен Шұғайып Сезімхан лайық деп танылды. ІІІ орынды Талғат Мықи (БҚО), Хазірет Бердіхан (Алматы) және Мөлдір Айтбай (Қызылорда) өзара бөлісті. Арнайы жүлде Нұрлан Есенқұловқа (Түркістан), Арғынбек Қалбаевқа (Маңғыстау) және Қалижан Білдәшевке (Шымкент) бұйырды. Барша ақынға қаржылай сый-сияпат жасалды.
Айтыс ақындары мен жыршы-термешілердің халықаралық одағының төрағасы Жүрсін Ерманның шешімімен Біржан Байтуов пен Рүстем Қайыртайұлы «Айтыстың ақтаңгері» атанды. Өз кезегінде, Еркебұлан Қайназаров «Алтын домбыраны» Түркістан қаласында қалдыру туралы шешім қабылдады. Ол «Ұлы дала елі» орталығы экспозициясына қойылады.