Бүгін Мемлекет басшысы Қасым-Жомарт Тоқаев Италия Президентімен және Премьер- Министрімен кездеседі. Қазақстан Президенті бұл елге ресми сапармен кеше барған болатын. Оны Рим әуежайынан Италияның қорғаныс министрі Гвидо Крозетто, Рим Папасының өкілі Франческо Каналини салтанатты түрде қарсы алды.
Осылайша, Қасым-Жомарт Тоқаев биылғы шет елге алғашқы ресми сапарын Еуропадан бастап отыр.
Бұрынырақ хабарлағанымыздай, Қазақстан басшысы 18 қаңтарда Италия Президенті Серджо Маттарелламен, Премьер-Министр Джорджа Мелонимен келіссөздер жүргізеді деп күтілуде.
Сондай-ақ Президент «Қазақстан-Италия» инвестициялық дөңгелек үстеліне қатысып, бірқатар ірі компания басшыларымен кездесулер өткізеді деп жоспарланған.
Ал 19 қаңтарда Қасым-Жомарт Тоқаев Ватиканға барып, Рим Папасы Францискпен кездеседі.
Жалпы Қазақстан мен Италия арасындағы дипломатиялық қарым-қатынас 1992 жылы тамызда орнаған. Сол жылы қазан айында елімізде Италия Республикасының елшілігі ашылды. Елшілік 2005 жылы Астанаға көшірілді. Ал Италияда Қазақстан елшілігі 1996 жылы ашылды.
Сол кездерден бері екі ел арасында талай барыс-келіс, алыс-беріс болды. Өткен жылдың 11 айында Қазақстан мен Италия арасындағы тауар айналымы 14,5 миллиард долларға жеткен.
ARDA-Aqparat